Pas mbledhjes së Kryesisë së LSI-së, Luan Rama ka deklaruar dhe piketat ku do të mbështetet kjo parti në opozitë.
Luan Rama u shpreh se LSI-ja ka vendosur që të forcojë edhe më shumë rolin e Grupit Parlamentar dhe riorganizimin e strukturave të partisë në të gjithë vendin.
“Të përshtatemi më mirë dhe të jemi një forcë opozitare që ofrojmë një kulturë qytetarë, përballë modelit arkaik dhe të kontestuar shpeshherë. Shkalla e përqëndrimit dhe detyrës opozitare është thelbi i demokracisë në vend. Do të nisim fazën e riorganizimit të strukturave në të gjithë vendin.
Merr një rol të rëndësishëm Grupi Parlamentar, që edhe cilësisht është me kualitete me përvojë, për përballimin e sfidave që ka opozita shqiptare. Kryesia miratoi që Grupi Parlamentar të ketë dy nënkryetar, Klajda Gjosha dhe Përparim Spahiu, ndërsa sekretare Nora Malaj. Zëdhënëse e Grupit Parlamentar do të jetë Floida Kërpaçi”, u shpreh Luan Rama.
Po ashtu Luan Rama u përgjigj interesit të gazetarëve sa i përket emrave që do të jenë pjesë e qeverisë së re bërë publike nga kryeminstri Rama. Po ashtu duke u ndalur te zgjedhja e Ruçit në krye të Kuvendit, Rama tha se LSI-ja nuk ka asgjë me emra në veçanti dhe se qëndrimin e saj do ta bëjë publik ditën e votimit në Kuvend.
“Përsa i përket projektit të mazhorancës për qeverinë dhe gjithçka tjetër që lidhet me organizimin apo drejtimin e Kuvendit, ne do të shprehemi kur të vijë koha kushtetuese. E rëndësishme është që ne jemi të vendosur që të jemi opozitë e fortë, opozitë realiste, kontruktive, pa asnjë dëm ndaj interesit qytetar. Mazhoranca ajo është, ato emra ka”, vijoi më tej Luan Rama.
(E.K/SHUPLAKA)
Discussion about this post