Edhe pse jemi 5 muaj larg zgjedhjeve parlamentare të 18 Qershorit, partitë politike kanë ndezur motorrët e fushatës.
Ndërkohë është mësuar edhe qarku ku do të kandidojë deputetja e LSI, njëkohësisht edhe bashkëshortja e kreut të saj, Ilir Meta, Monika Kryemadhi.
Burime të gazetës Telegraf bëjnë me dije se strukturat e LSI në Elbasan prej kohësh janë njohur me vendimin ende të pashpallur për të vendosur si drejtuese të qarkut, por edhe të parën në listën e deputetëve të LSI për qarkun e Elbasanit pikërisht Monika Kryemadhin.
Qarku i Elbasanit është një zonë politike jo shumë e thjeshtë, kur dihet ndikimi që ka PS sidomos pas zgjedhjeve lokale ku fitorja e Qazim Sejdinit u konkludua me 16 mijë vota më shumë në favor të socialistëve, pa harruar edhe deputetin Taulant Balla.
Në këtë zonë është e fuqishme edhe PDIU që kërkon të fitojë më shumë terren. Në zgjedhet e kaluara, ndikimi i deputetit Aqif Rakipi, mbi të gjitha në zonën e Peqinit, i dha shumë vota partisë së çamëve.
Ndërkohë, kreu i LSI-së Ilir Meta pritet të jetë i pari i listës në qarkun e Durrësit, edhe pse për momentin nuk ka asgjë të konfirmuar.
Aktualisht Monika Kryemadhi është deputete e qarkut të Lezhës. (A.R/SHUPLAKA)
