Ditën e diel në gjithë turqinë u zhvilluan zgjedhjet lokale ku Rexhep Taip Erdogan ka patur një përballje të vështirë për shkak të krizës së thellë ekonomike që ka përfshirë vendin.
Mediat e huaja bëjnë me dije se ka përfunduar numërimi i votave edhe në qytetin më të madh të Turqisë, Stamboll, dhe kandidati i opozitës, Ekrem Imamoglu rezulton fitues me 48.79% të votave. Ndërkohë, kandidati i mazhorancës, Binali Yildirim është renditur i dyti me një diferencë shumë të ngushtë, 48.51%.
Por duket se partia e presidentit Erdogan, do të përpiqet të kthejë rezultatin në favor të saj nëpërmjet rinumërimit të disa kutive. Zyrtarë të kësaj partie kanë dalë menjëherë në deklaratë dhe kanë ngritur pretendime për disa vota të konsideruara të pavlefshme, duke filluar kështu përpjekjet për ta marrë fitoren në tavolinë.
Kujtojmë se Erdogan ka humbur edhe kryeqytetin, Ankaranë si dhe disa qytete të tjera të mëdha të vendit, dhe për të dorëzimi edhe i Stambollit do të ishte një tronditje e madhe për pushtetin e tij.
“Do të apelojmë numërimin në çdo rajon të Stambollit dhe kjo do të sjellë progres për ‘Ak”, mësohet të jetë shprehur sekretar i përgjithshëm i partisë së Erdogan, Fatih Sahin.
Pas 25 vitesh, që kur Erdogan u zgjodh kryebashkiak i Stambollit në vitin 1994, drejtimi i këtij qyteti në bazë të rezultatit të mësipërm do t’i takojë një force opozitare.
