Në prag të zgjedhjeve parlamentare të 11 majit, rritet numri i zarfeve me votat e emigrantëve të dërguara pranë KQZ-së.
Në total KQZ ka dërguar 245935 zarfe në total, nga të cilët konfirmohet se janë postuar në destinacion nga kompania e kontraktuar 216577 zarfe.
Ndërsa ditën e djeshme (29 prill), kryekomisioneri Ilirjan Celibashi konfirmonte se kishin mbërritur pak më shumë se 70 mijë vota nga diaspora, ditën e sotme ky numër ka shkuar në 84783 vota, ose rreth 15 mijë më shumë brenda 24 orëve të fundit.
Rreth 30 mijë të tjera janë ende në proces dhe sipas Celibashit ka kohë ende për dërgimin në afatin e duhur dhe kthimin e tyre sipas procedurave ligjore. Gjithsesi ai shpjegoi se këto zarfe duhen shpërndarë sa më parë, pasi kompania do të paguhet vetëm pas procesit dhe sipas cilësisë dhe rezultatit të shërbimit. Ai u shpreh dje se procesi po ecën sipas parashikimeve, është pozitiv dhe me problematika sporadike që nuk e cenojnë këtë traditë të re.
