Komisioni Shtetëror i Zgjedhjeve në Maqedoni, mësohet se ka refuzuar edhe kërkesën më të fundit të partisë opozitare LSDM. Konkretisht është refuzuar me katër vota pro dhe katër vota kundër ankesa e koalicionit të kryesuar nga LSDM-ja për procedurën për votimin, përmbledhjen dhe konfirmimin e rezultateve, ku kërkohej anulimi i votimit në qendrën e votimit numër 2011, në komunën e Tearcës, në Njësinë Zgjedhore 6.
Mësohet se në këtë votim, përfaqësuesi i BDI-së në KSHZ, Subhi Jakupi, ka abstenuar. KSHZ ka refuzuar edhe pesë ankesa të tjera, ndërsa dy janë tërhequr nga vetë kreu i LSDM-së, Zoran Zaev.
Ankesa që është pranuar ka qenë vetëm ajo e Lëvizjes BESA. Sa i takon ankesave të refuzuara nga ky organ, çështja mund të merret në shqyrtim nga Gjykata Administrative, në rast se partitë ankimojnë veprimet e KSHZ-së.
Në rast se ankesa e Lëvizjes BESA, e cila është marrë në konsideratë, konfirmon rivotimin, partia VMRO-DPMNE do të ketë mandate të barabarta me LSDM-në, çka do të thellojë krizën politike që ka përfshirë shtetin maqedonas.
Discussion about this post