Zgjedhjet në Maqedoni. Lideri i BDI-së: Nuk jam i lumtur për fitoren, shqiptarët kanë humbur mandate

Bashkimi Demokratik për Integrim (BDI) po kryeson në vendvotimet në gjithë territorin e Maqedonisë, sipas të dhënave të publikuara nga KSHZ.

Deri tani BDI-ja kryeson tek partitë shqiptare me 38.985 vota, nga 566.779 vota të numëruara.

Sipas rezultateve paraprake jozyrtare, rezulton se BDI-ja fiton 8 deputetë,  BESA fiton 5 deputetë, PDSH-ja 2 deputetë dhe Aleanca për Shqiptarët 3 deputetë.

Por Lideri i BDI-së Ali Ahmeti, nuk është i lumtur për fitoren. Në një konferencë për mediat, të parën pas zgjedhjeve, Ahmeti është shprehur se BDI ka fituar 11 mandate dhe ka dalë partia e parë ndër shqiptarë, por kjo nuk e ka kënaqur sepse shqiptarët si tërësi kanë humbur shumë mandate në Parlamentin e Maqedonisë.

Deklarata e Ahmetit:

“Të gjithë duhet t’i gëzohemi faktit që këto zgjedhje janë zhvilluar pa eksese dhe probleme të theksuara dhe kjo do të thotë që vendi ynë shënon një progres dhe tregon pjekuri për të organizuar zgjedhjet të lira.

Bashkimi Demokratik për Integrim gjithmonë ka apeluar tek elektorati i vet dhe tek shqiptarët dhe ka kërkuar që shqiptarët të mos copëtohen të mos partizohen nëpër parti të vogla, sepse do të jenë humbës. Gjithmonë i kemi thirrur të gjitha partitë e vogla të bëhen bashkë, që të mos humbin shqiptarët. Me hidhërim e them se shqiptarët kanë humbur mandate. BDI ka fituar zgjedhjet, por mua më ka interesuar që të fitojnë shqiptarët në radhë të parë dhe prandaj nuk më gëzon fitorja e BDI.

Ne do të mbesim të vendosur të mbrojmë doktrinën tonë që kemi paraqitur para shqiptarëve. Do punojmë që ky vend të shkojë drejt stabilitetit të plotë. BDI nuk ndryshon kursin e vet, por do të punojmë fort, që kursi ynë të jetësohet e materializohet.

Ne e kemi vendin në NATO dhe BE. Ne do të jemi gardianë të fort të mbrojtjes së marrëveshjes së Ohrit. Do punojmë për marrëdhënie të mira ndëretnike dhe që ky vend të ketë perspektivë ekonomike”.