Situata e tensionuar politike, e cila duket se nuk po gjen zgjidhje, me mosmarrëveshjet midis palëve pozitë-opozitë, të cilat qëndrojnë të palëkundura në qëndrimet e tyre, duket se kanë krijuar një ngërç politik pak para zgjedhjeve të qershorit.
Në një shkrim kushtuar pikërisht zgjedhjeve të ardhshme, ish Ministri i Drejtësisë Ylli Manjani zgjedh të bëjë një krahasim ku në fokus ka, zgjedhjet e 31 marsit 1991 versus zgjedhjet e 30 qershorit 2019.
Kritik, përmes analizës e tij Manjani arrin në përfundimin se: “Ashtu sikurse në ato zgjedhje ku Partia e Punës konkurroi me organizatat “levë” të saj, një situatë shumë e ngjashme do të ndodh edhe me zgjedhjet lokale të Rilindjes më 30 qershor.”
Nga Ylli Manjani
Kujtesë:
Zgjedhjet e fundit fasadë që janë mbajtur në Shqipëri ishin ato të 31 marsit 1991.
Asokohe opozita politike (PD dhe PR) sapo ishte krijuar dhe pjesëmarrja në zgjedhje rezultoi e pamjaftueshme për të ndërtuar një parlament pluralist.
Në ato zgjedhje Partia e Punës konkurroi me organizatat “levë” të saj. Situatë shumë e ngjashme me zgjedhjet lokale që do të bëjë Rilindja më 30 qershor.
Ja kush ishin pjesmarrësit në zgjedhjet e ‘91:
- PPSH- Partia e Punës e Shqipërisë, ose partia Komuniste që më vonë u bë Partia Socialiste.
- BPSH- Bashkimet Profesionale të Shqipërisë. Një organizatë levë e PPSH që kryente detyra sindikaliste vetëm në parakalimet e 1 Majit dhe ndante fletë kampi.
- BR- Bashkimi i Rinisë, organizatë levë e PPSH që kontrollonte rininë shqiptare për llogari të partisë.
- KV- Komiteti i Veteranëve. Edhe kjo një organizatë levë e PPSH që “kujdesej” për veteranët dhe familjet e dëshmorëve në emër të partisë. Ndonjë element të KV mund ta ndeshësh sot duke mbajtur ndonjë fjalim nëpër varreza.
- FD- Fronti Demokratik, organizatë famëkeqe levë e PPSH, që kontrollonte çdo sjellje të njerëzve në lagje.
- BG- Bashkimi i Grave, ishte organizata e gruas së PPSH.
- PDSH- Partia Demokratike e njohur në dhjetor 1990. Pra vetëm me tre muaj jetë politike
- PR- Partia Republikane, e krijuar vetëm 1.5 muaj para zgjedhjeve.
- PE- Partia Ekologjike e krijuar nga eksponentë të Partisë së Punës.
- PA- Partia Agrare, edhe kjo e krijuar fët e fët para zgjedhjeve.
- OMONIA- organizatë politike e minoritetit Grek.
- Kandidatë të Pavarur
Ja, këto konkuruan në ato zgjedhje dhe PPSh fitoi 80% të vendeve në Parlament.
Të njëjtat zgjedhje do të Rilindë sot qeveria dhe Parlamenti MONIST!
