Komiteti Drejtues Kombëtar i Lëvizjes Socialiste për Integrim zgjodhi sot Kryesinë e re të saj, ku nuk mungojnë emrat e rinj.
Profesori që garoi përkrah Metës në garën për kreun e LSI-së, Shezai Rokaj, është zgjedhur kryetar i Komitetit Drejtues, ndërsa zv/ministrja e Integrimit Erisa Xhixho Sekretare për Marrëdhëniet me Publikun.
“Ishte kënaqësi sot për të konstituuar mbledhjen e parë të Komitetit Drejtues Kombëtar pas Konventës Kombëtare Zgjedhore, për të zgjedhur Kryesinë e re dhe njëkohësisht për të bërë edhe mbledhjen e parë konstituuese të kësaj kryesie. Jo vetëm kaq, por edhe për të zgjedhur edhe disa kolegë të tjerë të cilët do të kenë një kontribut të rëndësishëm në drejtimin e Kryesisë, KDK-së dhe gjithë strukturave të LSI-së, edhe në kuadër të rritjes të kolegjialitetit, bashkëpunimit dhe transparencës në drejtimin e kësaj force politike. Dua të uroj profesor Shezai Rrokajn, që u zgjodh kryetar i KDK-së me një votë gati unanime dhe njëkohësisht dua t’ju prezantoj Sekretaren e re për Marrëdhëniet me Publikun në LSI, Erisa Xhixhon, e cila nuk është e panjohur për ju dhe kjo është një nga arsyet që e kemi zgjedhur. Për të rritur dhe për të përmirësuar më tej komunikimin me mediat dhe në përgjithësi për të përmirësuar më tej marrëdhëniet me publikun të LSI-së. Ashtu sikurse kemi zgjedhur edhe Eriona Bixhën, Sekretare Organizative, z. Edmond Haxhinasto, Sekretar për Çështje Programore, dhe z. Bahri Shaqiri Sekretar për Sigurinë Kombëtare dhe natyrisht edhe kryesinë e re, emrat e të cilës tashmë i keni online. Besojmë të përmirësojmë më tej drejtimin e LSI-së si një element mjaft i rëndësishëm për të kontribuar në të gjithë përmirësimin e qeverisjes së vendit dhe të përmirësimit të kulturës së politikëbërjes në vend”, tha Meta para mediave.
Pak ditë më parë LSI zgjodhi edhe zv/kryetarin, Sekretarin e Përgjithshëm dhe dy nënkryetarët e rinj të saj.
Sekretar i Përgjithshëm u zgjodh Endrit Brahimllari, nënkryetari Luan Rama dhe Kejdi Mehmetaj, ndërsa zv/kryetar është zgjedhur kreu i Grupit Parlamentar, Petrit Vasili.
