Ministria e Transporteve ka njoftuar zyrtarisht konsorciumin “Catalyst” për të nisur negociatat e nënshkrimit të marrëveshjes koncesionare të rrugës Durrës-Kukës. Përmes një shkrese zyrtare të publikuar nga Agjencia e Prokurimeve, Ministria ka njoftuar përfaqësuesin ligjor të “Catalyst” në Abu Dhabi të paraqitet brenda një jave për nisjen e negociatave.
Agjencia e Prokurimit Publik zhbllokoi sot koncesionin për rrugën e Kombit ku makinat e vogla do të tarifohen me 5 euro.
Konsorciumi Catalyst brenda 60 ditëve do ekzekutojë marrëveshjen, çka për qytetaret do të thotë se rruga do të bëhet me pagesë.
Me 30 maj 2016 Komisioni i Vlerësimit të ofertave në Ministrinë e Transportit hapi ofertat për dhënien me koncesion të rrugës së Kombit.
Ofertuesit ishin, Catalyst në pjesë të së cilës ishin kompanitë shqiptare, Salillari dhe Kastrati dhe kompania turke Vendeka.
Me 29 gusht Komisioni i prokurimit Publik vendosi të skualifikojë konsorciumin Vendeta dhe të parakualifikojë Catalyst si dhe ta përcaktojë atë si ofertuesin e preferuar.
Përveç taksave që do të paguajnë qytetarët (5 euro për makinë) buxheti i shtetit do të paguajë në 13 vitet e para të koncesionarit të paktën 65 milionë euro.
Kjo shumë është zbardhur në raportin e zgjeruar të Komisionit të Prokurimit Publik, ku është shqyrtuar ankesa e grupimit “Catalyst” për skualifikimin nga gara për koncesionin e mirëmbajtjes së autostradës Milot – Morinë..
Kushti i pazbardhur tërësisht nga Ministria e Transporteve është pjesë e ofertës së koncesionit.
Për shkak se Rruga e Kombit nuk përcakton kriterin e trafikut, qeveria shqiptare ka marrë përsipër të kompensojë kompaninë fituese për 13 vitet në vijim, periudhë në të cilën pritet që trafiku të arrijë nivelin e maturimit.
Gjatë kësaj periudhe, buxheti do të alokojë një shumë ndërmjet 4-5 milionë eurove në vit ndaj kompanisë fituese.
Rruga e Kombit, në të gjithë gjatësinë e saj, është 116 kilometër, ndërsa vetëm gjysma e saj ka përfunduar (60 kilometër Rrëshen Kalimash).
Nga ana tjetër, drejtuesit paguajnë taksë qarkullimi mbi karburantin me 27 lekë për litër, që kryesisht ka funksion të gjenerojë fondet për mirëmbajtjen. Kështu, vetëm nga taksa e qarkullimit, buxheti i shtetit vjel 19 miliardë lekë ose afërisht 150 milionë euro, shumë kjo e mjaftueshme për mirëmbajtjen e rrugëve
Discussion about this post