Zbulohet rrëfimi i djalit për zhdukjen e babait të tij biznesmen, Adriano Jahaj, i cili është zhdukur para disa ditësh. Gazeta “Panorama” shkruan se pronari i hotel “Europa”, sëbashku me ndihmësin e tij, Ariseld Mazen, janë larguar me makinën e një mikut të tyre. Por ky mjet nuk është identifikuar ende, çka do të ndihmonte hetimin për të rënë në gjurmët e personave që Policia i ka shpallur të humbur.
Klaudio Jahaj, djali i biznesmenit i cili ka bërë denoncimin më 5 korrik, ka deklaruar në polici se i ati është larguar me makinën e një miku, por nuk e dinte se e kujt ishte. Kjo ka shtuar dyshimet e Policisë, e cila është duke punuar për të identifikuar mjetin me të cilin dy personat e humbur mendohet të jenë larguar nga Vlora.
Sipas Klaudios, më datë 03.07.2017 rreth orës 10:30, babai i tij Adriano Jahaj ka dalë nga shtëpia te hotel “Europa” dhe është nisur për në Durrës, për të marrë skafin e tij, të cilin e ka me dokumente dhe do ta sillte në Vlorë. Sipas dëshmisë së dhënë, babai i tij është nisur me automjetin e një shoku (nuk e di se të kujt) bashkë me shtetasin Ariseld Maze.
Djali i ka parë bashkë para nisjes babanë e tij dhe Ariseld Mazen te hoteli i tyre. Ai ka deklaruar se me vete kanë pasur telefonat, me të cilët më vonë nuk kanë komunikuar dot pasi kanë humbur kontaktin.
“Që ditën që janë larguar Adriano Jahaj dhe Ariseld Maze, nuk janë kthyer në shtëpi dhe as nuk kanë kontaktuar me telefon familjarët e tyre dhe nuk dinë se ku ndodhen. Ata s’kanë asnjë informacion dhe megjithëse u kanë rënë telefonave të tyre, dalin të fikur. Këtë e pohon edhe shtetasi Atiljo Maze, vëllai i Ariseld Mazes”, tregon policia.
Mendohet se dy të humburit, kanë qenë për të marrë një skaf që e kishin çuar për ta riparuar. Dyshohet se ata kanë dalë në det për të provuar skafin. Një mik i biznesmenit ka njoftuar familjarët e tij, se ai e kishte telefonuar dhe i kishte kërkuar ndihmë, pasi skafi po merrte ujë. Pas kësaj, telefonat kanë dalë të mbyllur.
Pas këtij moment nuk ka më asnjë gjurmë të biznesmenit, apo të ndihmësit të tij. (D.D/Shuplaka)
