Prokuroria e Përgjithshme reagon pas lajmit të publikuar nga një media italiane, ku thuhet se 1300 kontejnerë me armë kimike janë zhdukur në Shqipëri.
Në një prononcim për një të përditshme shqiptare, Prokuroria mohon që një hetim i tillë të ketë nisur nga antimafia italiane, e mbi të gjitha asgjë e tillë nuk është diskutuar mes Drejtorit të Antimafias italiane, Franko Roberti dhe Kryeprokuroriut Adriatik Llalla.
“Nuk ka ndonje hetim lidhur me sa pretendohet ne nje shkrim te shperndare pasditen e sotme, lidhur me hyrje te mundshme ne menyre te paligjshme te konteniereve me mbeturina.
Gjithashtu, ne takimin ndermjet Prokurorit te Pergjithshem, z. Adriatik Llalla dhe Drejtorit te Antimafias Italiane, z. Franko Roberti, nuk eshte diskutuar nje çeshtje e tille”, thotë Prokuroria e Përgjithshme.
Në shkrimin e publikuar nga “pianetaitalianews.it”, thuhet se rreth 2600 kontenierë, secili me 22 ton mbetje duhej të përfundonin për t’u ricikluar Maqedoni, në Shkup. Por, në Shkup kanë përfunduar vetëm rreth 1130 kontenierë. Bëhet fjalë për lëndë kimike shumë të rrezikshme që dyshohet se janë groposur në Shqipëri.
Po ashtu, në këtë artikull thuhet se prokurori i anti-mafias italiane mbërriti për këtë çështje në Tiranë dhe e diskutoi gjatë takimit me kryeprokurorin Adriatik Llalla. (D.D/Shuplaka)
