Gazetari Artur Zheji, në një analizë në portalin 360gradë.al shkruan se deklaratat e Ramës ndaj Greqisë dhe pro çështjes çame, më shumë se patriotizëm janë një dinakëri.
Rama, sipas Zhejit nuk është patriot dhe këtë e tregoi me ligjin për importin e mbetjeve. Por ai po shfrytëzon marrëzinë greke për të shpëtuar nga dështimet ku është zhytur qeveria e tij.
Madje Zheji shkon më tej, duke thënë se LSI-ja do të votojë kundër plehrave në dekretin e Nishanit dhe socialistëve do t’u mbetet proçka e tyre.
“Do të mbetet në fuqi Dekreti i Nishanit, sepse LSI do të votojë kundër Plehrave dhe pro dekretit që e hedh poshtë këtë Ligj turpi. Do të votojë po ashtu edhe Shpëtim Idrizi, me ata deputetë që i binden vullnetiti të tij, Agron Duka, por edhe Dash Peza dhe Erion Brace, Ben Blushi apo Mimoza Hafizi, si edhe sigurisht në bllok, edhe Opozita.
“Marrëzia dhe ndjeshmëria arrogante Helene, është tanimë kamerdarja shpëtimtare, që i hidhet kryeministrit të turpëruar shqiptar, në skandalin e Plehrave, në skandalin e Përgjimeve të paligjshme, në skandalin e gropave financiare të kompanive shtetërore, në betejën e humbur me drogën dhe mafien e saj, me pushtet edhe shtetëror, në rrënimin e imazhit që sot kryeministri ka, më shumë se asnjëherë”, vijon ai.