Në epokën e Panuccit ishte kthyer në zakon që lista e kombëtares pësonte ndryshime thuajse çdo ditë pas publikimit të saj, por tradita po vazhdon edhe me trajnerin e ri Edy Reja.
Ka ndryshime në listën e kombëtares A për dy ndeshjet zyrtare ndaj Islandës në transfertë më 8 qershor dhe Moldavisë në “Elbasan Arena” më 11 qershor ora 20:45.
Egzon Binaku është dëmtuar në ekipin e tij IFK Norrkoping në ligën suedeze dhe në këto kushte e ka të pamundur të bashkohet me kuqezinjtë.
Po ashtu mesfushori Ledian Memushaj i grumbulluar me përfaqësuesen në kompleksin “Tropikal” ka shfaqur probleme fizike duke e bërë të pamundur rikuperimin në kohë për dy përballjet.
Një tjetër futbollist që do të mungojë është edhe Marash Kumbulla, i cili për shkak të angazhimit me klubin e tij, Hellas Verona në Itali do të bashkohet me U-21 në datë 3 qershor për transfertën e Turqisë.
Për këtë të fundit dihej që kishte ndeshje me Veronën dhe me rregullore të FIFA-s Shqipëria ka të drejtë ta mbajë, por me sa duket FSHF nuk ka dashur të ketë probleme me klubin italian.
Për të gjithë lojtarët e mësipërm nuk do të vijnë zëvendës.
Discussion about this post