Zjarr masiv në Kreshpan të Fierit, flakët përfshijnë 10 hektarë me ullinj dhe kullota

Vijojnë zjarret në jug të vendit. Ditën e sotme një zjarr masiv ka përfshirë një hapësirë të gjerë me ullishte në Patos të Fierit.

Policia bën me dije se zjarri ka rënë në fshatin Kreshpan, ku kanë mbërritur 2 zjarrfikëse të cilat po punojnë për shuarjen e flakëve.

Mësohet se zjarri ka përfshirë 10 hektarë me ullinj dhe kullota. Zjarrfikësit e kanë të vështirë ndërhyrjen për shkak se era po favorizon zjarrin. Në ndihmë të zjarrfikësve kanë shkuar edhe banorët, të cilët me mjetet e tyre po mundohen të shuajnë flakët dhe të shpëtojnë ullishtet. (D.D/Shuplaka)