Zjarret, Greqia tërheq urgjentisht avionët nga jugu i Shqipërisë, nuk dihet arsyeja

Avionët e Greqisë që kishin ardhur për të ndihmuar në shuarjen e flakëve në Jug të Shqipërisë janë larguar drejt Athinës, madje arsyet e këtij largimi nuk dihen.

Shefi i ushtrisë greke ka urdhëruar tërheqjen e menjëhershme të avionëve grekë nga jugu i Shqipërisë.

Me një urdhër urgjent dhe pa asnjë sqarim të shefit të ushtrisë greke avionët “Canadair” janë larguar urgjentisht nga hapësira ajrore e Shqipërisë. 

Sipas burimeve pranë Drejtorisë së Zjarrfikësve në Athinë, urdhëri u dërgua urgjent rreth orës 12.45, me orën lokale dhe menjëherë dy avionët kanë përfunduar operacionet e tyre në zonën e Bularatit, Muzinës, Dhrovjanit dhe Zervatit në jug të Shqipërisë, për t’u larguar drejt bazës së tyre në Elefsina, pranë Athinës. 

Ndonëse situata në Greqi është e qetë dhe nuk ka fronte intensive zjarri, askush nuk e di arsyen përse shefi i ushtrisë greke ka vendosur braktisjen e operacioneve në vendin tonë, ku situata e zjarreve ka arritur kulmin, deklaruan burime pranë Drejtorisë së Zjarrfikësve për Top Channel. 

Krahas kësaj, i sigurt tashmë është fakti që fronti i zjarreve në jug të Shqipërisë do të përkeqësohet. Pak ditë më parë ministri i Jashtëm shqiptar, Ditmir Bushati falenderoi Greqinë për ndihmën e dhënë në fikjen e zjarreve me avionët e saj në jug të vendit tone, raporton TCH.

Por sipas burimeve të “Shuplakës” në kontakt me palën greke, ka pasur një mungesë koordinimi për shuarjen e flakëve mes autoriteteve shqiptare dhe avionëve grekë.

Në një rast zjarri në Delvinë avionëve grekë u janë dhënë koodinata të gabuara nga pala shqiptare. Madje avionët grekë janë mbajtur pezull nga pala shqiptare, edhe pasi kishin marrë “ok” nga autoritetet e tyre për të ndërhyrë.

 Por edhe pas kësaj kur kanë ndërhyrë rreth orës 10-të ka pasuar një gjendje kaosi, kjo sepse forcat shqiptare kanë tentuar vetë t’i shuajë flakët, duke shkaktuar një kaos në terren. Aktualisht edhe Greqia po përballet me problemin e zjarreve dhe ka ngritur helikopterët për shuarjen e tyre.

Gjtë ditës së djeshme në territorin Gjirokastër, Delvinë, Mallakastër, shiheshin 4-5 vatra aktive ditën e djeshme.

(B.H/Shuplaka)