Agjencia Kombëtare e Mbrojtjes Civile ka dalë me një përditësim të situatës nga zjarret në vend, ku bie në sy se dhe Parku Kombëtar i Lurës është prekur nga zjarret.
Zjarri ka rënë pranë “Liqenit të Luleve”, dhe është aktiv në dy vatra: poshtë Liqenit të Zi dhe mbi fshatin Gurë-Lurë.
Po ashtu, vijon zjarri i madh në Sotiran, në vendin e quajtur “Qafa e Shëngjergjit”, mbi fshatin Dukat, njësia administrative Orikum, bashkia Vlorë.
Flakët, të ndihmuara nga era kanë përfshirë edhe kurorën e pishës, duke e bërë situatën problematike. Operacioni për shuarjen vazhdon me forca operacionale, të ndihmuara nga 30 forca ushtarake, 1 helikopter i FA-së dhe 2 avionë Canadair.
Një vatër zjarri është shënuar në fshatin Shmil, njësia administrative Labinot-Mal, bashkia Elbasan, në kufi me fshatin Gurakuq, njësia administrative Orenjë, bashkia Librazhd.
Zjarri ka rënë në pyll gështenje dhe ka përmasa të konsiderueshme ndërsa puna për shuarjen e flakëve vijon në një terren të vështirë.
Sipas të dhënave të raportuara në Qendrën Kombëtare Operacionale të Emergjencave Civile, deri në orën 14:00 janë raportuar 13 zjarre, nga të cilat 3 vatra janë shuar, 9 janë aktive dhe 1 është në monitorim.
Në operacionet për shuarjen e zjarreve janë angazhuar 21 automjete zjarrfikëse dhe 519 forca operacionale. Gjithashtu, në operacionet e ditës së sotme marrin pjesë 190 forca nga FA me 19 mjete dhe 1 helikopter, 2 avionë Canadair nga Greqia dhe 1 avion Canadair nga Italia.
Janë shuar plotësisht vatrat në:
Fshatin Guras, njësia administrative Buçimas, bashkia Pogradec
Fshatin Lapardha, njësia administrative Otllak, bashkia Berat
Fshatin Buz-Madh, njësia administrative Cakran, bashkia Fier
Njoftimi i plotë i Agjencisë Kombëtare të Mbrojtjes Civile:
Qarku Dibër
Në “Liqeni i Luleve”, pjesë e Parkut Kombëtar Lurë, njësia administrative Lurë, bashkia Dibër, zjarri është aktiv në dy vatra: poshtë Liqenit të Zi dhe mbi fshatin Gurë-Lurë.
Në fshatin Strikçan, njësia administrative Zerqan, bashkia Bulqizë, është në monitorim një vatër zjarri në sipërfaqe me shkurre, ferra dhe bar të thatë.
Në fshatin Zall-Gjoçaj, njësia administrative Derjan, bashkia Mat, vijon puna për shuarjen e zjarrit në “Përroi i Zi”, një zonë pyjore me pisha dhe ah. Janë angazhuar forca operacionale dhe 30 efektivë të FA. Po ndihmon në terren edhe 1 avion Canadair nga Italia.
Qarku Vlorë
Në Sotiran, “Qafa e Shëngjergjit”, mbi fshatin Dukat, zjarri është shumë intensiv. Po digjen shkurre dhe fier, si dhe janë përfshirë kurorat e pishave. Operacioni vazhdon me forca të shumta dhe mbështetje ajrore.
Qarku Elbasan
Në fshatin Shmil, njësia Labinot-Mal, bashkia Elbasan, pranë kufirit me fshatin Gurakuq, bashkia Librazhd, zjarri në pyllin me gështenja ka përmasa të konsiderueshme.
Qarku Lezhë
Në zonën e Shkopetit, njësia Milot, zjarri është përhapur në territorin e bashkive Kurbin, Mat dhe Mirditë. Janë angazhuar 26 forca ushtarake me 4 mjete dhe 1 helikopter, si dhe MZSH Kurbin me 1 zjarrfikëse dhe 50 efektivë, MZSH Mirditë me 11 efektivë. Ndërhyrja ajrore ka ndaluar përhapjen drejt banesave dhe bizneseve në Shkopet. Terreni është i vështirë dhe i paarritshëm për mjete. Nuk ka rrezik për objektet e banimit.
Qarku Korçë
Në fshatin Vernik, njësia Qendër Bilisht, bashkia Devoll, zjarri është ende aktiv. Drejt pikës kufitare të Kapshticës është vendosur nën kontroll, por po vijon puna në drejtim të fshatit.
Në fshatin Dishnicë, njësia Bulgarec, bashkia Korçë.
Qarku Gjirokastër
Në fshatin Kosinë, njësia Qendër Piskovë, bashkia Përmet, vijon puna për shuarjen e zjarrit në terren të vështirë.
