Zjarri i shkon pak metra larg shtëpisë, flet kryefamiljari në Ulëz: Jemi të lodhur, gati të dorëzohemi. Fëmija im është sëmurë

Që prej katër ditësh, vijon zjarri në Trodhan të bushkashit në Ulëz. Mirëpo autoritetet ende nuk u janë përgjigjur thirrjes së banorëve për ndihmë.

Kryefamiljari i familjes Sefgjini, në një lidhje të drejtpërdrejtë për Neës 24, është shprehur se pas një lufte të gjatë me flakët, ai dhe banorët e tjerë ndihen të lodhur dhe gati të dorëzohen. Ai tregon se deri ëm tani askush nuk u ka ardhur në ndihmë, pavarësisht se ka dëgjuar në media se rreth 20 ushtarë janë nisur për t’i ndihmuar.

“Që dje, po merremi me zjarrin këtu afër, na ka rrethuar nga të dyja krahët. Ka dalë nga kontrolli, jemi të lodhur, të raskapitur, nuk dimë se çfarë të bëjmë.

Fëmija im ka pasur marrje mendësh, probleme me frymëmarrje, s’ka qenë mirë fare. I tërë ambienti është i ndotur, mezi marrim frymë.

Nuk mund të largohemi se këtu kemi të gjitha, rrush, të mbjella.Askush nuk ka ardhur për të na ndihmuar.  Burreli thotë jam interesuar dhe asgjë fare.Thonë që janë nisur 20 ushtarë për këtu e nuk është nisur asnjë person.

Të më sjellin një helikopter të më fikin zjarrin afër shtëpisë, mos të më digjen njerëzit, bagëtia, tokat.

Nuk mund ta përcaktoj fare sepse zjarri është në tre pjesë, është zjarr masiv, mbi 60 hektarë të djegur në masë, ne kërkojmë të paktën tqë na shpëtohet shtëpia, jemi në krizë, jemi shumë të lodhur. Nga dje nuk kemi pushuar fare, jemi shumë të lodhur.”, është shprehur zoti Sefgjini.

Kujtojmë se edhe një ditë më parë, zoti Sefgjini bënte thirrje që autoritetet t’i ndihmonin me helikopter për të fikur zjarrin, për shkak se ndërhyrja nga toka është shumë e vështirë dhe zjarri prej disa ditësh është përkeqësuar akoma më shumë. Mirëpo asnjë nuk i është përgjigjur. Tanimë zjarri ndodhet vetëm pak metra larg shtëpisë së tij. (D.D/Shuplaka)