Vijon zjarri në Mallakastër, i cili ka shkaktuar mjaft dëme në fshatin Çorrush, ku janë djegur mbi 100 hektarë tokë, ku përfshihen 3 banesa, bujqësi dhe blektori.
Lidhur me ngjarjen ka folur edhe kryetari i Bashkisë Mallakastër Agron Kapllanaj, i cili në një prononcim për Ora News, është shprehur sendërhyrja me helikopter ishte e pamundur për shkak se emergjencat civili kishin vetëm një tyë tillë në dispozicion dhe ai ndodhej në Dropull.
“Kemi mbajtur në kontroll dy lagje të cilat i kemi shpëtuar, por njërën prej tyre nuk mundëm, dhe zjarri ka djegur tre banesa. Banorët janë evakuuar të gjithë, por situata është e rëndë. Helikopteri ishte e pamundur të vinte, sepse Emergjencat disponojnë vetëm një dhe ai ishte në Dropull kështu që ne kemi punuar me mjete rrethanore dhe 2 zjarrfikëse nga Fieri dhe Mallakastra. Kanë marrë pjesë punonjës të bashkisë, të policisë që kanë punuar në terren. Dëmet janë kolosale, zjarri ka djegur mbi 100 hektare dhe brenda tyre ka të mbjella, djersa e banorëve, janë disa banesa, ka blektori, bletë që janë shkrumbuar.”, tha Kapllanaj.
Ndër të tjera Kapllanaj tha se zjarri është shkaktuar nga një banor i fshatit i cili ka djegur mbetjet e grurit në tokë mirëpo më pas situata i ka dalë jashtë kontrollit. (D.D/Shuplaka)
