Zëvëndës kancelari gjerman Sigmar Gabriel, në një deklaratë për revistën gjermane “Der Spiegel” është shprehur se një shpërbërje e Bashkimit Europian nuk është më e papërfytyrueshme. Socialdemokrati Gabriel tha se përpjekjet e zellshme të vendeve si Franca dhe Italia për të reduktuar deficitet e tyre buxhetore janë shoqëruar me rreziqe politike.
“Dikur pyeta Kancelaren se çfarë do t’i kushtonte më shumë Gjermanisë: Të lejonte Francën të kishte një deficit 0.5 për qind më të madh, apo Marine Le Pen të bëhej presidente e vendit fqinj. Deri më sot ajo nuk më ka kthyer një përgjigje”, ka shtuar më tej Gabriel, partia e të cilit kërkon më shumë fokus tek investimet, ndërkohë që konservatorët e Merkelit e vënë më shumë theksin në disiplinën fiskale si themel të prosperitetit ekonomik.
SPD-ja pritet të zgjedhë Gabrielin, kreun prej një kohe të gjatë të partisë, i cili tashmë shërben edhe si ministër i Ekonomisë, të garojë përballë Merkelit për postin e Kancelarit në zgjedhjet federale të muajit shtator. Lajmi është konfirmuar nga burime të larta partiake gjatë së enjtes. I pyetur më tej nëse, vërtet mendon se mund të fitojë më shumë vota duke transferuar më shumë parà nga Gjermania drejt vendeve të tjera të BE-së, Gabriel ai u shpreh se ky diskutim është aspak popullor.
“Megjithatë, unë jam në dijeni të gjendjes së BE-së dhe mund të them se, nuk është më e paimagjinueshme shpërbërja e tij. Nëse kjo do të ndodhte, fëmijët dhe nipërit tanë do të na mallkonin. Kjo sepse Gjermania është përfituesi më i madh i komunitetit europian, ekonomikisht dhe politikisht”, shtoi ai. (J.V/Shuplaka)
