Zëvendëskryeministrja Ledina Mandija ka denoncuar pak minuta më parë punësimet jashtë kontrollit në Drejtorinë e Hekurudhave në Durrës.
Ajo shprehet se janë firmosur 11 shkresa dhe janë punësuar 20 persona gjatë periudhës 25 Maj-12 Qershor. Kjo bie në kundërshtim me ligjin, i cili ndalon punësimet apo largimet nga puna në Administratë përgjatë fushatës zgjedhore.
Zv/kryeministrja thekson se marrja në punë në këtë periudhë është e ligjshme vetëm kur ka raste të përligjura. Në deklaratën e saj citohet se i janë përcjellë shqetësime nga punonjës të Drejtorisë së Përgjithshme të Hekurudhës se po ushtrohet trysni për të marrë pjesë në aktivitet elektoral që do të mbahet sot.
Mandija i ka kërkuar ministrit Sokol Dervishaj që të verifikojë rastet në fjalë dhe të marrë masa konkrete. Gjithashtu në rast se konstatohet që kjo problematikë nuk do te ndiqet me përparësi, zyra e zëvendëskryeministres do t’i dërgojë materialet përkatëse pranë Prokurorisë së Përgjithshme.
“Për këtë arsye, zv/Kryeministrja i ka kërkuar ministrit z. Sokol Dervishi të marr masat për të bërë verifikimet e duhura dhe nxjerrjen e përgjegjësive disiplinore të çdo nëpunësi dhe për ta vënë në dijeni në mënyrë të menjëhershme për rezultatet e gjetura dhe masat e marra si dhe në rast se konstaton që kjo problematikë nuk do te ndiqet me përparësi, zyra e zëvendëskryeministres do t’i dërgojë materialet përkatëse pranë Prokurorisë së Përgjithshme”, citohet ndër të tjera konkretisht në njoftim.
(XH.A/SHUPLAKA)
