Zëvendëskryeministrja e Shqipërisë, Ledina Mandija, është duke zhvilluar një takim kokë më kokë me Kryeprokurorin Adriatik Llalla.
Nga informacionet e deritanishme, flitet se në qendër të këtij takimi ka qenë diskutimi për një marrëveshje bashkëpunimi për Mbikëqyrjen e Shërbimit Civil, mes Këshillit të Ministrave, Prokurorisë së Përgjithshme dhe Komisionit Qendror të Zgjedhjeve për hetimin e rasteve abuzive.
Kryesisht, bashkëpunim për procesin zgjedhor për të shmangur përdorimin e burimeve njerëzore në fushatat elektorale.
Gjatë bashkëbisedimit, ajo nënvizoi rëndësinë e rolit të organit të Prokurorisë, në hetimin e rasteve të përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për vitin 2017. Mandija i kërkoi Prokurorit të Përgjithshëm në mënyrë specifike që të hetohet në drejtim të rasteve të përdorimit të burimeve të siguruara nga veprimtaritë e paligjshme.
Prokurori i Përgjithshëm, shprehu vullnetin dhe angazhim maksimal si dhe është dakordësuar për formalizimin e një marrëveshje bashkëpunimi ndërinstitucional.
Më parë, Zv/Kryeministrja ka realizuar takime edhe me Kryetarin e KQZ-së dhe Komisionerin e Mbikëqyrjes së Shërbimit Civil me të cilët është rënë dakord për një marrëveshje bashkëpunimi ndërinstitucionale, e cila pritet të nënshkruhet së shpejti.
(XH.A/SHUPLAKA)
