Zyrtarizohet tërheqja e kandidatit socialist Klodian Shehit nga zgjedhjet në Kavajë. Me anë të një kërkese drejtuar KZAZ-së 42 në Kavajë, Shehi tregon arsyet e këtij vendimi.
Sipas Shehit, ky vendim vjen si pasojë e situatës politike, për të mos i shkaktuar asnjë dëm qytetarëve të Kavajës. Të paktën kështu shkruhet në shkresën e publikuar nga BalkanWeb.
Pak orë më parë, kandidati i Partisë Socialiste për zgjedhjet e pjesshme në Kavajë është shprehur se kërkesën për tërheqjen nga gara e ka marrë vesh nga televizionet.
“Kërkesën për tërheqjen e kam marrë vesh nga televizionet. Jam i gatshëm të kandidoj për Kavajën në çdo moment”,-tha Shehi.
“Unë do bëj më të mirën për t’i shërbyer qytetit tim”,-tha më herët Shehi për ”News24”.
Lajmin për tërheqjen nga gara, e bëri me dije vetë kryeministri Edi Rama. Edhe pse kishte premtuar se nuk do të tërhiqej nga gara me kandidatin e pavarur, Rama veproi, duke mos i lënë asnjë mundësi Klodian Shehit të vazhdojë garën. Edhe pse në kuadrin e një sugjerimi për të, vendimi i Ramës është i qartë, bashkë me sugjerimin për tërheqjen e kandidatit të pavarur. (D.D/Shuplaka)
