Pas dhunës në Kuvend, Partia Socialiste protokollon sot kërkesën e saj për përjashtimin nga Kuvendi të 7 deputetëve të opozitës. Kjo ishte paralajmëruar prej ditës së djeshme nga ana e Kreut të Grupit Parlamentar në PS Taulant Balla.
Kërkesa për përjashtimin me 10 ditë nga Kuvendi bëhet për deputetët: Monika Kryemadhi, Flamur Noka, Endrit Braimllari, Ervin Salianji, Kejdi Mehmetaj, Endri Hasa dhe Bardh Spahia. Po ashtu dje për këta deputetë ka nisur dhe procedimi nga ana e policisë.
Duke folur për situatën në Kuvend gjatë zgjedhjes së kryeprokurorores Gramoz Ruçi u shpreh gjatë ditës së sotme, që ajo që ndodhi nuk kishte ndodhur asnjëherë gjatë periudhës së demokracisë në vendin tonë.
“Asnjë opozitë nuk ka kërkuar militantëve të saj që të sulmojnë Policinë për të hyrë në Kuvend. Në asnjë rast nuk ka ndodhur që të përdoren tymuese ose mjete të tjera në drejtim të drejtuesit të seancës dhe të kryeministrit. Dhe e treta në asnjë seancë më herët nuk ka ndodhur që deputetët të ushtrojnë dhunë ndaj kolegëve të tyre, duke iu marrë edhe kartat e votimit.
Nuk votuan tre deputetë pasi nuk kishin me se të votonin. Në mediat tuaja është deklaruar se kandidatja për prokurore e përkohshme ishte suport i dy deputetëve Manja dhe Felaj. E dini ju që pikërisht këta dy deputetë nuk votuan?! Është normale kjo që dy deputetëve tiu hiqet e drejta për të votuar. Nga ana tjetër ishin dy kolegë që votuan me kartat e deputetëve të tjerë, për shkak se të tyren ua kishin vjedhur. Ky është komenti që unë kam. Votimi është normal”, u shpreh Gramoz Ruçi.
(E.K/FAXWEB)
Discussion about this post