Zbulohet dënimi i parë që kap zyrtarët, në kuadër të ligjit të dekriminalizimit. Gjykata e Tiranës ka dënuar zyrtarin e parë, i cili është dërguar në gjyq me akuzën e falsifikimit të formularëve të dekriminalizimit.
Bëhet fjalë për një inspektor në Drejtorinë Rajonale të Autoritetit Kombëtar të Ushqimit, në Tiranë, me inicialet L.Z. Vendim ky i 23 qershorit të 2017-ës.
Inspektori është shpallur fajtor për akuzën e “falsifikimi i vulave, i stampave ose i formularëve”. Sipas gjykatës, zyrtari nuk ka pasqyruar në formularin e vetëdeklarimit një dënim me gjobë të marrë nga Gjykata e Tiranës, 13 vjet më parë.
Ai është dënuar me 6 muaj burg. Shqyrtimi gjyqësor ndaj tij është zhvilluar me procedurën e gjykimit të shkurtuar dhe për këtë shkak masa e dënimit është ulur në 4 muaj burg. Gjatë gjykimit, i pandehuri ka pohuar që nuk e dinte se ishte dënim, por gjobë. “Jam bërë pishman që nuk e kam deklaruar”, ka pretenduar ai. Inspektori i AKU-së nuk do të shkojë në qeli, për shkak se përfundimisht Gjykata ka vendosur pezullimin e ekzekutimit të dënimit me burg, duke e lënë në Shërbim Prove.
“Urdhërohet pezullimi i dënimit me burgim, duke e vënë në provë të pandehurin L. Z. për një periudhë kohe prej 8 muajsh, me kusht që gjatë kësaj kohe i pandehuri të mos kryejë vepër tjetër penale”, thuhej në vendimin e gjykatës. Referuar vendimit, referimi penal për të pandehurin L. Z. është bërë nga Sektori i Verifikimit të Integritetit pranë Prokurorisë së Përgjithshme.
Dënimi që inspektori nuk ka deklaruar, është një gjobë prej 100 mijë lekësh dhënë nga Gjykata e Tiranës, në vitin 2004. Ai ishte fajësuar për akuzën e “shkeljes së rregullave të qarkullimit rrugor”. Për shkak të gjykimit të shkurtuar, përfundimisht ishte gjobitur me 66.6 mijë lekë. (D.D/Shuplaka)
