Kryebashkiaku i Tiranës, Erion Veliaj, i dorëzon titullin “Qytetar nderi” si edhe “Çelësin e Qytetit” shkrimtarit, veprimtarit dhe akademikut kosovar Adem Demaçit.
Veliaj u shpreh se ishte i lumtur që iu dha mundësia t’i dorëzonte këtë titull një figure të rëndësishme të çështjes shqiptare, siç është Demaçi.
“Sot kemi një rast shumë të veçantë e nuk besoj se mund të kishte rastësi më të bukur se sa Ditën tonë të Pavarësisë ta kujtojmë duke i dhënë titullin “Qytetar Nderi” mikut, vëllait dhe patriotit të madh Adem Demaçi. Sot është një ditë e shënjuar për të gjithë shqiptarët, jo vetëm në Shqipëri ku jemi sot por kudo ku jetojnë ata në trevat tona, në Ballkan apo në emigracion. Është shumë me vend që në një ditë si kjo të kujtojmë, jo vetëm ato figura që shpallën pavarësinë tonë të parë, 104 vite më parë, por çdo shqiptar të mirë që ka luftuar për çështjen shqiptare.”, është shprehur kryetari Veliaj.
Ky titull iu dorëzua Demaçit me motivacionin e intelektualit të shquar, simbol i rezistencës për liri, pavarësi dhe prosperitet, për kontributin dhe sakrificat e tij ekstreme në kohën e ish-Jugosllavisë.
Në atë periudhë Demaçi ka qenë veprimtar i çështjes kombëtare, ka luftuar për liritë dhe të drejtat e Kosovës dhe barazisë së saj me republikat e tjera. Për këtë angazhim të tij, ai është dënuar disa herë nga regjimi jugosllav duke vuajtur 28 vjet heqje lirie.
Dhënia e këtij titulli nuk përkon vetëm me Festën e Pavarësisë, por edhe me 80-vjetorin e lindjes së Demaçit, ç’ka shënon gëzimin e tretë brenda ditës.
