Prindërit e 23-vjeçarit Fatjon Barmeta kanë reaguar së fundmi lidhur me vendimin e Gjykatës së Apelit ndaj tre autorëve të krimit, të cilët akuzohen se vranë dhe groposën të riun. Konkretisht, gjykata dënoi me 25 vite burg Përparim Bojën, me 17 vite vëllanë e tij Astritin dhe me 15 vite burg Fation Canin.
Pas vendimit të Apelit, prindërit e të riut, Liman dhe Nexhmije Barmeta, shprehen se vazhdojnë të sorollaten nëpër gjykata prej katër vitesh. Ai shprehet për “GSH” se korrupsioni në këtë rast ka nisur që natën e parë të vrasjes: “Përgjatë tri ditëve që policia nuk u interesua, u fshehën të gjitha provat, dhe pas tri ditësh na njoftuan “hajdeni se e kemi gjetur djalin të vdekur”. Nëse do të kishin vepruar atë ditë, djalin do e kisha sot të gjallë.”
Liman Barmeta hekson se gjatë gjithë procesit gjyqësor të zhvilluar në Tiranë, ata nuk janë njoftuar asnjëherë për të qenë të pranishëm. Më tej, babai i 23-vjeçarit e cilëson qesharak vendimin e dhënë së fundmi ndaj tre autorëve të vrasjes të të birit.
“Gjykata e Apelit, e cila la në fuqi vendimin e gjykatës së Burrelit, ishte një vendim qesharak. Vendimi u dha sikur autorët të ishin hajdutë dhe jo tre kriminelë që në mënyrën makabre, çnjerëzore e të pashpirt e shkatërruan djalin tim në zgavrën e kraharorit dhe e groposën të gjallë me ekskavator duke i hedhur sipër disa metra kub zhavorr. Sipas ekspertizës, dhe pavarësisht se janë fshirë provat, djali im ka jetuar edhe nën zhavorr.”, shprehet ai.
Pavarësisht vendimit gjyqësor të Gjykatës së Apelit, prindërit e Fatjon Barmetës shprehen se nuk do të ndalen dhe do ta ndjekin këtë çështje deri në Strasburg. Nëse edhe në këtë rast, drejtësia nuk do të vihet në vend, do i rikthehet Kanunit kundrejt dëshirës:
“Çështjen e djalit do ta ndjek deri në Strasburg. Nëse nuk japin drejtësi për djalin tim të vetëm, unë do të detyrohem, jo se kam dëshirë, por do t’i kthehem Kanunit. E përsëris se, do të detyrohem që t’i kthehem Kanunit që të vendos vetë drejtësinë mbi drejtësi.” (XH.A/SHUPLAKA)
Discussion about this post