Sikundër ishte njoftuar, ka nisur paraditen e sotme protesta e Forumit Rinor të Partisë Demokratike.
Në kuadër të Ditës Kombëtare të Rinisë, të rinjtë demokratë do të protestojnë paralelisht në disa institucione të vendit. Dhjetëra prej tyre janë vendosur tek Ministria e Shëndetësisë për të shprehur pakënaqësitë dhe kritikat e tyre ndaj ministrit Ilir Beqaj. Në pankartat e tyre shkruhet “Liri dhe demokraci”.
FRPD proteston sot përpara Ministrisë së Shëndetësisë, asaj të Arsimit, ministrisë së Brendshme, Bashkisë së Tiranës dhe Kryeministrisë.
Pritet që rreth mesditës, protesta të zhvendoset tek Kryeministria. Nuk dihet nëse do të ketë prononcime nga protestuesit.
Krahas protestës të të rinjve të Tiranës, mësohet se po zhvillohen protesta edhe në qytetet e Korçës, Sarandës dhe Kukësit.
