Ish-deputeti i Partisë Demokratike, Gazment Bardhi nëpërmjet një postimi në rrjetës sociale ka reaguar lidhur me vrasjen e 25-vjeçarit në Tiranë në Ditën e Rinisë, ku ai thotë se para 30 vitesh rinia vritej e rrihej nga regjimi komunist ndërsa sot qeveria aktuale gjobit e vret po njësoj.
Bardhi thekson se vrasja e të riut ka ndodhur pa shkak dhe se vetë policia po përpiqet të fsheh dhe manipulojë të vërtetën. Ai thotë se Rama ndërtoi për 8 vite modelin e Policisë e cila nuk lufton krimin e organizuar por gjobit, burgos dhe vret qytetarët e pambrojtur. Sekretari i Përgjithshëm i PD theksoi se policia që vret në Ditën e Rinisë është modeli më i keq që i Policisë së Shtetit.
Postimi i plotë i Gazment Bardhit:
Para 30 viteve rininë e rrihte, persekutonte dhe vriste Gramoz Ruçi, sot e dhunon, gjobit dhe vret Edi Rama dhe Sandër Lleshaj. Kanë ndryshuar vetëm emër, por jo model!
Vrasja e një të riu 25 vjeçar, vetëm se nuk i ndaloi Policisë për vendosjen e maskës dhe orarin e ndalimit të lëvizjes, është shokuese. Të dhënat e para për vrasjen e një 25-vjeçari në mes të Tiranës nga Policia e Shtetit hedhin dyshime të forta për vrasje me dashje pa asnjë shkak. Njoftimet zyrtare të Policisë së Shtetit qartazi krijojnë bindjen e tentativës për manipulimin dhe fshehjen e së vërtetës, me justifikime qesharake të denja për një bandë.
Prokuroria duhet të ndërmarrë menjëherë masat për ndalimin e manipulimit të ngjarjes dhe zbardhjen e të vërtetës. Secili prej nesh pret drejtësi për këtë akt kriminal të pashembull dhe i shpreh ngushëllimet më të sinqerta familjes.
Policia që vret një të ri në Ditën e Rinisë është modeli më i keq i Policisë së Shtetit. Sot vrasësi i të riut nuk është efektivi i policisë, por Edi Rama dhe Sandër Lleshaj, me politikën e tyre qeveritare të armiqësimit të Policisë me qytetarët dhe miqësimit të Policisë me bandat.
Është irrituese që në 8 vite Edi Rama ndërtoi modelin e Policisë që nuk lufton krimin, por burgos, gjobit dhe vret qytetarët e pambrojtur.
Është e paprecedentë që në 8 vite në vend të komunikatave të përditshme sesa grupe kriminale ka zbuluar dhe arrestuar, Policia e Shtetit është fokusuar vetëm tek informacioni i përditshëm sesa gjoba i ka vendosur qytetarëve. Kjo nuk është arsye se përse ekziston Policia e Shtetit. Kjo është një politikë e gabuar, që e armiqëson Policinë me qytetarët dhe e miqëson me bandat.
Kjo duhet të marrë fund menjëherë!
(E.G/Faxweb.al)