Dy procedura të lidhura me raportet mjedisore për impiantin në inceneratorin e Elbasanit janë rishpallur sërish nga subjekti Eco Elb që ka edhe administrimin e aktivitetit.
Në Agjencinë e Prokurimit Publik u njoftua shpallja për kontratën: (Për Impiantin) Monitorimi i parametrave mjedisore dhe hartimi i raporteve mjedisore, (Për landfillin) Monitorimi i parametrave mjedisore dhe hartimi i raporteve mjedisore me një fond limit total prej 6 milionë lekësh.
Më herët Komisioni i Prokurimit Publik nënvizoi në një vendim të tij se ECO Elb nuk kishte respektuar detyrimet që lidheshin me respektimin e hallkave të ankimimit. Një operator i cili kishte qenë pjesëmarrës në procedurë ankimoi pranë KPP s’kualifikimin nga gara duke e cilësuar atë të padrejtë dhe do të ishte vetë KPP që do t’i jepte pjesërisht të drejtë këtij ankimimi.
Në vijim KPP do të kërkonte hetim të procedurës nga Agjencia e Prokurimit Publik si dhe marrjen e masave nga ana e ECO ELB që të bënte rishpalljen të procedurës duke reflektuar ndryshimet e rekomanduara.
Tenderët për monitorimin mjedisor
Eco Elb deklaronte në dokumentet e procedurës së qëllimi raportit të monitorimit është të pasqyrojë situatën reale të performancës mjedisore të landfill-it të Elbasanit dhe të paraqesë ndikimet që ky objekt kanë mjedis përreth në përputhje me kërkesat ligjore.
Është e rëndësishme që të dhënat e prodhuara të jenë përfaqësuese, të domosdoshme, të vlefshme dhe që lejojnë vlerësimin e saktë të ndikimit të deponisë në mjediset.
Qëllimi i programit të monitorimit fillimisht duhet të identifikohet nga procesi i hetimit, vlerësimit të ndikimit në mjedis dhe natyra e mbetjeve që depozitohen. Ai duhet të përfshijë të gjitha fushat mjedisore që mund të ndikohen ndjeshëm përmes funksionimit të landfillit.
Eco Elb është kompani e krijuar në 18.11.2021 dhe ka në objekt të aktivitetit “Grumbullimi, rehabilitimi dhe përpunimi i mbetjeve të ndryshme, organike, të ngurta, të gjelbërta,..etj, në territorin administrativ të të gjithë bashkive të Qarkut Elbasan. Trajtimi i mbetjeve me djegie (incenerator). Prodhimi dhe shitja e energjisë elektrike. Aktivitete të tjera në fushën e përpunimit të mbetjeve, që lejon ligji, për interesat e shoqërisë dhe të komunitetit. Aksionerë të saj janë Bashkia Cërrik me 8 për qind, Gramsh me 8 për qind. Elbasan 52 për qind, Peqin 8 për qind, Belsh 8 për qind, Librazhd 8 për qind.
Aktualisht çështja e inceneratorëve mbetet ndër ato me më shumë vëmendje pas avancimit të hetimeve nga ana e SPAK ku pak kohë më parë u lëshuan 11 urdhër arreste dhe pesë persona u vunë në pranga. Çështja përfshin jo vetëm inceneratorin e Elbasanit por edhe të Fierit dhe Tiranës.
MONITOR
Discussion about this post