Ministri i Mbrojtjes, Pirro Vengu, zhvilloi një vizitë zyrtare në qarkun e Shkodrës, ku bashkë me drejtuesit vendorë diskutoi hapat konkretë për forcimin e kapaciteteve vendore në përballimin e emergjencave civile dhe përmirësimin e infrastrukturës parandaluese, veçanërisht në zonat e thella.
Gjatë takimeve me autoritetet vendore dhe përfaqësues të strukturave të sigurisë, Ministri theksoi rëndësinë e krijimit të një zinxhiri të qëndrueshëm reagimi, duke përmendur edhe rritjen e pranisë së Forcave të Armatosura në rajon si pjesë e planeve të Ministrisë së Mbrojtjes.
“Angazhimi ynë është maksimal për të garantuar një sistem funksional dhe të qëndrueshëm, jo vetëm në nivel kombëtar, por edhe lokal. Shkodra, për shkak të specifikave të saj gjeografike, kërkon një vëmendje të veçantë,” – u shpreh ministri Vengu në rrjetin social “Facebook”.
Një nga projektet konkrete në fokus është krijimi i Qendrës Rajonale të Emergjencave Civile, e cila do të shërbejë si një pikë koordinimi dhe ndërhyrjeje të shpejtë në rast fatkeqësish natyrore apo situatash të rënda.
Ky projekt zhvillohet në bashkëpunim me Agjencinë Kombëtare të Mbrojtjes Civile, e cila në koordinim me strukturat vendore do të garantojë zbatimin e standardeve të nevojshme për parandalim, reagim dhe rikuperim në situata emergjente.
Ministria e Mbrojtjes mbetet e përkushtuar në rritjen e efikasitetit të sistemit të mbrojtjes civile dhe në mbështetjen e autoriteteve lokale me burime njerëzore, logjistikë dhe trajnime të specializuara.
