Presidenti i Republikës së Shqipërisë, Bujar Nishani, ka dekretuar sot datën e zgjedhjeve parlamentare. Me vendim të tij, zgjedhjet do të zhvillohen ditën e diel, më 18 qershor 2017, ditë kur shqiptarët do të japin verdiktin e tyre.
“Në mbështetje të nenit 92 shkronja “gj” dhe 93 të Kushtetutës së Republikës së Shqipërisë, si dhe të nenit 9, paragrafi 1 dhe 2, të ligjit nr. 10019, datë 29.12.2008 “Kodi Zgjedhor i Republikës së Shqipërisë”, i ndryshuar,
D e k r e t o j
Neni 1
Zgjedhjet për Kuvendin të zhvillohen ditën e diel, më datë 18 qershor 2017.
Neni 2
Ky dekret hyn në fuqi menjëherë.
Nr. Dekreti 9883”, citohet në njoftimin e Presidencës.
Me këtë vendim, Kreu i Lartë të Shtetit ka kaluar parashikimet duke shpallur që ditën e sotme dekretin për caktimin e zgjedhjeve të ardhshme 2017.
Referuar Kodit Zgjedhor, data e zgjedhjeve caktohet me dekret nga Presidenti i Republikës së Shqipërisë, sipas rregullave të përcaktuara në nenin 65 të Kushtetutës. “Mandati i Kuvendit fillon me mbledhjen e parë të tij pas zgjedhjeve dhe përfundon në të njëjtën datë të të njëjtit muaj të vitit të katërt nga data e mbledhjes së parë”, theksohet në Kushtetutë.
Bazuar në këtë nen, mbledhja e parë e këtij Kuvendi është zhvilluar më 9 shtator 2013 dhe do të jetë data 9 shtator 2017, datë e mbylljes së mandatit aktual.
Discussion about this post