Nga Agim Xhafka
TV-të, gazetat, portalet shkruanin për ikjen nga kjo jetë të Andrea Stefanit. Pati shumë postime ngaqë ishte njeri publik, gazetar e analist i përhershëm për shumë e shumë vite rresht. Në këtë dendësi informacionesh e opinionesh ndeshen mjaft ekzaltime, fyerje, lavdërime e sharje. Por ndër to më tërhoqi vëmendjen këshilla e shumëpërsëritur se një i larguar nga kjo jetë nuk duhet cekur aspak për ç’ka thënë sa ai ishte gjallë. Se i vdekuri nuk përgojohet, nuk kritikohet, nuk shahet, etj,etj,.
Shoh që ka një konfondim thuajse të qëllimshëm mes njeriut Andrea dhe gazetarit Stefani. Pra pritet rruga, ndalohet në se dikush do që të analizojë mendimin që ka shfaqur e shkruar ky gazetar sepse ai nuk rroka më!!!
O njerëz, Andrea u largua nga kjo jetë dhe të gjithëve u vjen keq për të.Të tërë shprehin ngushëllime per familjen dhe miqtë e tij. Por ai ka qënë edhe njeri publik. Ka shprehur ide,ka mbajtur qëndrime,ka shkruar duke vlerësuar e kritikuar. Pra ka një krijimtari mbi të cilën nuk mund të ndalohet askush të japë vlerësimin në e pëlqen apo jo, të verë notë apo të gjykojë. Po në se Andrea do ishte p.sh.piktor dhe për një tablo të tij do të thoshim se nuk na pëlqen hiç do të bërtisnit: heshtni se ai ka vdekur e nuk duhet ta vlerësoni?!
Ja kështu ndodh dhe me shkrimet e analizat e tij. Që për shumë njerëz janë krejt të paanshme e për shumë të tjerë janë të gjitha të porositura nga qeveria.
Nuk mendoj se heshtja totale është në të mirë të punës krijuese të Stefanit. Ai do analizuar per idetë dhe konkluzionet që jepen nuk kanë pse të ndalen meqënëse ai nuk rron më. Se u largua nga jeta njeriu Andrea, por gazetari Stefani është ende mes nesh në shkrimet e gazetave dhe në filmimet e tv-ve. E për shumë vite do e kemi sërish “gjallë”. Nga këto materiale ne do të shohim nëse ai gjykoi drejt apo gabim lëvizjet e politikës dhe të liderëve që donte e që urrente Andrea Stefani. Do i vemë notën krejt analizave të tij ndërtuar mbi logjikë të fortë apo mbi shtylla rëre…
