Policia sekuestron urdhrin e mbrojtjes së Liljana Rukaj, gruaja që bashkëshorti e hodhi nga kati i katërt

Policia e Fierit ka shkuar në gjykatë e ka sekustruar dosjen e “Urdhrit të mbrojtjes” së Liliana Rukaj.

Rukaj është gruaja 42-vjeçare e cila u hodh nga kati i katërt i një pallati në Fier, prej bashkëshortit të saj.

Ferdinand Rukaj është arrestuar dy ditë më parë nga policia e Fierit, pasi akuzohet se hodhi nga dritarja e banjës të banesës bashkëshorten e tij, Liljana Zhezha-Rukaj, e cila kishte kërkuar pak kohë më parë urdhër-mbrojtje.

Në këtë urdhër ndër të tjera citohet se i denoncuari nuk duhej t’i afrohej paditëses më shumë se dy metra.

Veç kësaj, gjykata urdhëroi burrin të mos kryente vepra të dhunës, të mos kontaktonte me Liljana Rukaj dhe të paguante detyrimin ushqimor.

Urdhri u dha një muaj më parë nga gjykata e Fierit, e cila pranoi kërkesën e gruas, por që nuk u zbatua nga bashkëshorti i saj. Por, ministri Sajmir Tahiri më herët ka sqaruar se në polici nuk ka arritur asnjë urdhë mbrojtje, gjë që sipas tij duhet ta bënte gjykata. Kështu policia ka nisur me iniciativë procedim penal për të zbuluar pse urdhri i mbrojtjes nuk ka ariitur në kohë tek ata.