Thjesht i ka paguar kafen bashkëshortes së një polici, së paku nga sa thotë por tërbimi i efektivit ka qenë i frikshëm.
59-vjeçari nga Korça dëshmon për ”Shuplaka”-n se është rrahur nga polici, veprim që më pas edhe e ka denoncuar.
Ilir Terolli dëshmon se punonjësi i policisë kufitare në Goricë Gjergji Gjorgji ka ushtruar dhunë jo vetëm ndaj tij po edhe familjarëve. Terolli thotë se në 18 nëntor është dhunuar fizikisht nga Gjergji Gjorgji ndërsa shkak për këtë është bërë xhelozia e dhunuesit për bashkëshorten.
Terolli është ofruar t’i paguajë kafen për mirësjellje gruas së kontrollorit dhe një shoqes së saj pasi janë takuar rastësisht në një lokal në Kostur të Greqisë dhe ky gjest është kthyer në motivin e sherrit. Bashkëshortja e policit ka dyqan te tregu maqedonas në Korçë dhe pikërisht është ky vendi ku 59-vjeçari është rrahur si mos më keq.
Terolli i dëmtuar në sy dhe fytyrë si pasojë e dhunës, kërkon drejtësi pasi ka bërë denoncimin ne polici dhe ndaj tij dhe familjarëve po ushtrohet presion që të tërheqë denoncimin.
‘’Nuk e tërheq denoncimin. Më ka kërcënuar, më ka ofruar edhe lek. Dua që drejtësia të veprojë ose më mbetet mua te bëj vetëgjyqësi’’, është shprehur Terolli.
”Disa ditë më pas u takova rastësisht me policin Gjorgji, të cilin e njihja prej pesëmbëdhjetë vjetësh. U habita kur m’u drejtua sikur unë paskam dashur të bëhesha ” hamshori” i gruas së tij. Më pas më goditi me grusht në sy,me shtriu përtokë dhe me këpucë më godiste në fytyrë. Rashë pa ndjenja dhe u zgjova në spital. Hundën e kisha të thyer, kisha plage,por me kryesorja është se kam humbur gjysmën e shikimit të njërit sy”, vazhdon më tej dëshminë Terolli.
Sipas burimeve të policisë, ka nisur procedim penal për policin nga Shërbimi i Çështjeve të Brendshme dhe Ankesave dhe e gjithë çështja e denoncuar nga Terroli është në hetim.
Mësohet se 59-vjeçarit i është dhënë edhe numri i shefit të shërbimit, me qëllim që për çdo shqetësim të ri të kontaktojë drejtpërdrejtë me efektivët. Megjithatë mësohet se djali i Terollit ka ardhur posaçërisht nga Italia për të marrë hakun e të atit.
Por Terolli është i vendosur t’i shkojë deri në fund ngjarjes që sipas tij ndodhi vetëm se u tregua i sjellshëm me zonjën që qëlloi të qe bashkëshortja e një polici./ SHUPLAKA
