Sindikata e Pavarur e Arsimit të Shqipërisë ka shprehur zhgënjimin e saj për lënien në harresë edhe këtë vit të gjithë mësuesit e Arsimit parauniversitar.
Ata shprehen se sërish për të tretin vit radhazi është shkelur e drejta e tyre, e fituar me lëvizje sindikale që në ’99, e cila fillimisht është marrë si pagë, më pas si pagë të 13-të, e vitet e fundit në formën e shpërblimit.
“Këtë vit, pritshmëria e sindikalistëve dhe mësuesve për të marrë shpërblimin e fundvitit ishte e madhe sepse këtë shpërblim ata nuk e marrin prej tre vitesh radhazi.
Edhe më e lartë ishte pritshmëria e mësuesve për marrjen e këtij shpërblimi këtë fundviti edhe për faktin se qeveria kishte deklaruar se vështirësitë buxhetore, të cilat kanë qenë argumenti kryesor për mospagesën e shpërblimit në vitet e mëparshëm, janë kapërcyer.”, shkruhet në njoftimin e sindikatës.
Ata shprehen se pavarësisht takimit të organizuar me ministren e Arsimit, Lindita Nikolla, e cila shfaqi mirëkuptimin dhe sugjeroi një takim me stafin teknik të Ministrisë së Financave që u zhvillua më 20 dhjetor, ende nuk ka përgjigje dhe nuk është ndërmarrë asnjë hap.
“Aleanca Sindikale e konsideron këtë qëndrim të qeverisë si shkelje të vazhdueshme të një të drejte sindikale të fituar dhe për këtë arsye, do të vazhdojë të kërkojë respektimin e kësaj të drejte, duke përdorur të gjitha mjetet sindikale dhe ligjore.
Për këtë në datën 7 janar 2017 Aleanca Sindikale do të mbledhë Asamblenë e saj për të përcaktuar hapat dhe veprimet sindikale e ligjore që do të ndëmerren në vijim, pasi është shkelur jo vetem Kontrata Kolektive, por edhe disa dispozita të ligjit të Kodit të Punës.”, përfundon deklarata. (XH.A/SHUPLAKA)
Discussion about this post