Policia greke ka zbuluar të tjera detaje nga ngjarja e tmerrshme e ndodhur pak pas mesnatës së sotme, ku humbi jetën një 50-vjeçare shqiptare.
Grabitja me armë ka ndodhur rreth orës 02:00 të ditës së sotme, në një banesë në lagjen “Peristeri” të Athinës, ku disa grabitës të armatosur kanë hyrë në banesën e një familjeje shqiptare, dhe kanë tentuar t’i grabisin me dhunë. Pas një përleshjeje fizike mes kryefamiljarit 53-vjeçar dhe grabitësve të cilët nuk kanë ngurruar të përdorin armët, ka humbur jetën në vend bashkëshortja e tij 50-vjeçare.
Gazeta “Prothothema” shkruan se autorët e vrasjes janë shqiptarë dhe dyshohet se ishin tre persona dhe jo dy siç u përfol fillimmisht. Sipas dëshmitarëve, grabitësit kanë thirrur në shqip “Lekët, lekët shpejt!”.
Mësohet se brenda në shtëpi ndodheshin edhe vajza e çiftit me djalin e saj. Sipas raportimeve, ka shumë gjasa që tre të rinjtë të njiheshin me viktimën, por kjo e fundit mund të ketë identifikuar njërin prej tyre dhe ata kanë qëlluar duke e vrarë.
Mediat greke kanë publikuar edhe foton e bashkëshortit, i cili gjithashtu ka mbetur i plagosur nga të shtënat, dhe ndodhet në spital në gjendje kritike për jetën. (D.D/Shuplaka)
Discussion about this post