Shqipëria renditet nga italianët krahas vendeve si Kuva, Greqia, Maroku, Tajlanda, Britania e Madhe, për të bërë biznes. “economia-italia.com” rendit vendin tonë si një ndër destinacionet që sugjerohen për të investuar gjatë 2017-ës.
Për vendin tonë, një profil i detajuar është është realizuar në këtë kontekst edhe nga Shoqata e Dhomave të Tregtisë Italiane me Jashtë, në të cilën thuhet se në Shqipëri ka rreth 400 kompani italiane që operojnë.
Një nga sektorët që sugjerohet është energjia, ku vlera e investimeve italiane llogaritet në rreth 3 mld euro. Gjithashtu vlerësohet si mundësi për kompanitë italiane edhe projekti i gazsjellësit TAP, duke qenë se ka një marrëveshje mes vendeve ndërtuese. Sektor tjetër me interes, në periudhë afatshkurtër, është edhe bujqësia, turizmi, si dhe ai i modës.
“Të investosh në Shqipëri është e mundur në disa sektorë, si energjia, turizmi, transporti dhe mineralet. Ky vend po modernizohet edhe në sektorin e veshjeve. Mjaft mirë po ecin edhe qendrat e mirëqenies. Qeveria është duke investuar në gjallërimin e qendrave urbane. Kostoja e punës është mjaft e ulët. Paga mesatare mujore llogaritet në rreth 300 euro. Norma e tatimit mbi fitimin është 15%.”, shkruan italianja, përcjell “Monitor”.
Por Shqipëria përmendet edhe si një vend që ka korrupsion të lartë, spekulime dhe krim të organizuar. Ndaj cilido që kërkon të investojë, duhet të marrë në konsideratë këta faktorë. Më tej, “economia-italia.com” e krahason Shqipërinë me Kubën, “si një lloj Kube në Mesdhe”.
“Shqipëria po bëhet në njëfarë mënyre si një lloj Kube në Mesdhe, siç ishte Kuba për Shtetet e Bashkuara të Amerikës, një vend ku ka shumë bukuri natyrore, me nivel të ulët taksimi e ku një sipërmarrës mendjemrephtë mund të guxojë. Një vend i duhur për të investuar në turizëm ose në aktivitete që lidhen me këtë sektor.” (XH.A/SHUPLAKA)
Discussion about this post