9 vjet nga tragjedia e Gërdecit, asnjë politikan i pranishëm në përkujtimore

Kanë kaluar 9 vjet nga 15 marsi 2008, datë kur u shënua tragjedia e Gërdecit ku humbën jetën 26 persona dhe u plagosën rreth 300 të tjerë.

Ditën e sotme, familjarët e viktimave i janë drejtuar memorialit të ngritur në Gërdec, për të përkujtuar të afërmit e tyre që humbën jetën tragjikisht. Ajo që vihet re është se asnjë politikan apo zyrtar nuk është i pranishëm.

Sot pas nëntë vitesh, ata ndihen të zhgënjyer me kryeministrin Rama që premtoi se pas vendosjes në krye të qeverisë, çdo gjë do të ishte ndryshe. “Sipas Ramës, fajin e paskan gjykatat. E dimë që Kryeministri Rama do të përsërisë të njëjtin refren për kalvarin e gjyqeve tona, se fajin e paskan gjykatat dhe se po i shkon goja mbrapa duke thënë pse duhet Vettingu.”,  janë shprehur ndër të tjera në letër ata.

9 vite më parë, një shpërthim përfshiu fabrikën e modifikuar me llamarina që shërbente për demontimin e armëve.

“Reuters” shkroi atëherë se spitalet u mbushën me të gjymtuar, të djegur dhe të tjerë do të dëmtoheshin nga grimca xhamash të thyer. Ditë zie kombëtare dhe protesta të shumta ndoqën ngjarjen e asaj kohe, duke bërë që ky shpërthim dhe pasojat e tij të merrnin prioritet në programin viziv ditor.

Pas kësaj ngjarje, ministri i Mbrojtjes i asaj kohe, Fatmir Mediu, dha dorëheqjen nga posti. Ai nuk pranoi se kishte përgjegjësi për shpërthimin ose ndonjë lidhje korruptive në tregtinë e armëve dhe u shpreh se dorëheqja nga posti ministror ishte një “përgjegjësi morale”.

(XH.A/SHUPLAKA)