Pas Ramës edhe Bushati sulmon Bashën: Është interesin e PD-së, të pushojë baltën ndaj miqve strategjikë

Pas kryeministrit Edi Rama, ka reaguar edhe ministri i Punëve të Jashtme Ditmir Bushati, për deklaratat e kreut të opozitës Lulzim Basha.

“Absurd interpretimi i Lulzim Bashës për qëndrimin e prerë të SHBA, që nuk luajnë me Kushtetutën e parimet themelore për një shoqëri demokratike. Thirrja është për datën kushtetuese të zgjedhjeve, për 18 Qershorin! Është në interesin e PD që të pushojë diversionin e baltën ndaj miqve e partnerëve strategjikë të Shqipërisë dhe të marrë përsipër përgjegjësitë ndaj votuesve të saj!”, shprehet ministri.

Ndërkohë vetëm pak më parë, kryeministri Rama ka shkruar në rrjetet sociale me ironi ndaj interpretimit të kreut të PD-së Lulzim Basha mbi thirrjen e Departamentit Amerikan të Shtetit për zgjedhjet e 18 qershorit.

“Lulëzimi e paska interpretuar thirrjen e Departamentit të Shtetit që gjithë partitë të hyjnë në zgjedhje, si një mbështetje për fantazinë e tij se po nuk hyri PD në zgjedhje, zgjedhjet nuk u bëkan as sipas Shteteve të Bashkuara! Në fakt e kundërta është e vërtetë. Shqipëria ka zgjedhje në 18 qershor. Dhe askush në botën e logjikës elementare demokratike, as nuk e diskuton fare datën kushtetuese të zgjedhjeve”, ka shkruar Rama. (D.D/Shuplaka)