I thanë “Po” Nishanit, Rama dhe Basha takohen nesër paradite?

Kryetari i Partisë Socialiste, Edi Rama dhe kryetari i Partisë Demokratike, Lulzim Basha, iu përgjigjën pozitivisht ftesës së Presidentit të Republikës, Bujar Nishani për mbajtjen e një tryeze bisedimesh me qëllim zgjidhjen e ngërçit politik.

Ndërkaq flitet se ky takim i kërkuar nga Kreu i Lartë i Shtetit do të zhvillohet paraditen e nesërme. Ky është lajmi që po qarkullon lidhur me negociatat që thuhet se kanë nisur mes dy partive politike.

Ishte fillimisht kreu i PS-së e më pas Partia Demokratike me një deklaratë në emër të gjithë koalicionit opozitar, të cilët shprehën gatishmërinë për bisedime.

“Presidenti i Republikës, Sh.T.Z. Bujar Nishani po ndjek me shumë shqetësim përmasat që po merr kriza politike në vend. Ndaj edhe njëherë i kërkon Kryeministrit të vendit dhe Liderit të Opozitës të ulen në tryezën e bisedimeve me vullnetin për kompromis, për të tejkaluar këtë situatë të vështirë për vendin. Presidenti Nishani ofron të gjithë gatishmërinë dhe angazhimin e tij institucional në shërbim të këtij dialogu.”, citohej në kërkesën e Nishanit.

(XH.A/SHUPLAKA)