Në letrën e tij të falënderimit, trajneri Xhani De Biazi kishte renditur arsye që e bënin atë të kishte një tjetër qëndrim nga ai i 24 orëve të mëparshme ku u shfaq në FSHF duke akuzuar dhe shfryrë.
Përpos fjalëve të mira për kreun e FSHF-së, lojtarët dhe bashkëpunëtorët e tij, ra në sy mungesa e falënderimit në emër të veçantë për të paktën katër bashkëpunëtorë që e kanë shoqëruar atë në këtë rrugëtim.
Alban Bushi, ish-menaxheri i Kombëtares që aktualisht është në krye të U-21 dhe ish-futbollisti i De Biazit për pak kohë dhe më pas ish-ndihmësi i tij Erjon Bogdani gjithashtu nuk u përmendën personalisht në letrën e falënderimeve të trajnerit.
Ish-tekniku i kuqezinjve përmendi disa herë ndihmën e bashkëpunëtorëve të tij të ngushtë, madje edhe për punonjësit e FSHF-së, por harroi të lakonte emrin e Denis Bastarit, i cili ka bërë jo pak vite përkthimin e tij dhe i ka qëndruar pranë Kombëtares dhe trajnerit italian. Altin Lala, një tjetër ish-ndihmës i De Biazit, nuk u lakua në letrën falënderuese të teknikut. (E.K/SHUPLAKA)
Discussion about this post