GRUAJA E PARË SHQIPTARE që drejton një parti, Monika Kryemadhi në krye të LSI-së

Petrit Vasili ka dhënë dorëheqjen nga drejtimi i LSI-së. Kjo pasi sipas tij LSI-së i duhet të jetë më aktive gjatë kohës që do të jetë në opozitë. 

Vasili e ka komunikuar vendimin e sotëm në mbledhjen e Kryesisë së partisë. Ndërkohë që rreth orës 14:00 ai pritet të japë një komunikim për mediat. 

”Dorëheqja ime bëhet për çështje organizative në mënyrë që LSI-ja të jetë më aktive në opozitë”, shprehet paraprakisht Vasili. 

Kujtojmë se rezultati i LSI-së ishte më i mirë se ai i katër viteve më parë duke marrë 19 mandate deputetësh, po mesa duket pritshmëritë e kësaj force kanë qenë më të larta.

Sipas statutit të LSI-së pas dorëheqjes së Vasilit drejtimi i Partisë i kalon nënkryetares që në këtë rast është Monika Kryemadhi.

Po ashtu nga ajo që mësohet është se Konventa e LSI-së do të mblidhet të mërkurën dhe në të pritet që të zgjidhet kryetari i ri i kësaj force politike. Po ashtu mësohet paraprakisht se der më tani emri i kryetares së re është ai i Monika Kryemadhit. Kjo do të bënte dhe risi sa i përket drejtimit të një partie të madhe në vend.  (E.K/SHUPLAKA)