Prej disa kohësh Taulant Xhaka është shndërruar në një nga futbollistët me më shumë polemika në kombëtaren Shqiptare.
Pas problemeve dhe debateve që pati me teknikun De Biazi sa u la jashtë skuadrës, duket se punët nuk janë aspak mirë dhe me trajnerin e ri të Kombëtares, Panuçin.
Në lidhje me këtë situatë, ish-kapiteni i Kombëtares Altin Lala thotë se në rast se Xhaka ka refuzuar një takim me Panuçin atëherë ky do të ishte një gabim i madh i tij. Lala vijon më tej duke thënë se trajneri i ri kushdoqoftë ai duhet të mbështetet nga të gjithë.
“Jam informuar nga media për këtë ngjarje. U befasova të them të drejtën. Nuk kishte arsye që Xhaka të mos takonte trajnerin e ri. Ose nëse ka pasur, duhej të kishte qenë transparent me publikun. Nuk e kuptova, por më duket një gabim i Xhakës. Trajneri i ri, kushdo qoftë ai, duhet mbështetur.
Aq më tepër nëse ai vjen të të takojë, atëherë minimalisht duhet të tregosh respekt dhe ta takosh, pavarësisht vendimit që mund të kesh marrë në lidhje me Kombëtaren. Ishte pa kuptim ajo sjellje, sepse nuk i shërben as harmonisë në grup. Për fat të keq, Xhaka e ka rast të përsëritur’’, shprehet Lala në një intervistë për ‘’Panorama Sport’’. (E.K/SHUPLAKA)
