LSI i bën thirrje kryeministrit Rama që të heq dorë nga bllokimi i Vetingut. Nga Selia e Kuvendit e ish-ministri i Drejtësisë dhe njëheraz deputet i LSI-së, Nasip Naço u shpreh se drejtësia nuk është pronë e asnjë partie.
Reagimi i LSI-së vjen në një moment që PS-ja vetëm me votat e saj miratoi uljen e numrit të personave që do të jenë pjesë e organeve të Vetingut.
“LSI ka mbështetur dhe do mbështesë në çdo rast çdo kërkesë për ushtrimin e kushteve të komisionit të Vettingut. Kjo është e ndryshme nga vullneti i qeverisë.
I bëjmë thirrje mazhorancës që të reflektojë se organet e drejtësisë janë shumë të rëndësishme. Drejtësia nuk është e asnjë partie”, tha Nasip Naço nga Selia e Kuvendit.
Kujtojmë se pas debateve të ashpra për disa orë, Komisioni i Ligjeve ka miratuar numrin e punonjësve për organet e Vettingut. Është miratuar numri i punonjësve për Kolegjin e Apelimit, Komisionin e Kualifikimit dhe Komisionerin Publik.
Ligjet kanë miratuar 110 punonjës në staf për këto institucione të rëndësishme të Vettingut, nga 185 që ishin kërkuar. Në fund, vetëm me votat e mazhorancës, Komisioni miratoi 50 punonjës për Komisionin e Kualifikimit nga 65 që kishte kërkuar. Komisionerit Publik i dha 26 nga 53, ndërsa atij të apelimit vetëm 37 nga 68.
Ndërkohë, anëtarët e Partisë Demokratike janë larguar nga mbledhja e Komisionit të Ligjeve, duke mos votuar një pikë, që kishte të bënte me propozimin për shtimin e numrit të punonjësve.
Menjëherë pas largimit nga mbledhja, deputeti Halimi foli për media, ku i bëri thirrje mazhorancës të reflektojë deri ditën e enjte, kur pritet të mblidhet seanca plenare.
“Jemi kundër mazhorancës për të shkurtuar numrin e punonjësve të organeve të Vettingut. Mosvënia në dispozicion e stafit të mjaftueshëm për organet e Vettingut do të përbënte kërcënim ndaj veprimtarisë tepër të rëndësishëm të tyre. I bëjmë thirrje mazhorancës që të reflektojë deri ditën e enjte”, tha Halimi.
(E.K/SHUPLAKA)
Discussion about this post