Në Maqedoninë fqinje, vazhdojnë takimet e grupeve të punës mes VMRO-DPMNE-së së Nikolla Gruevskit dhe LSDM-së së kryeministrit Zoran Zaev, me qëllim arritjen e një kompromisi për votimin e ligjeve që kërkojnë 2/3 e votave në Kuvend. Bisedimet po zhvillohen me dyer të mbyllura.
Edhe pse asnjëra palë nuk jep detaje në lidhje me ecurinë e bisedimeve, mësohet se përveç planit 3-6-9, mes pozitës dhe opozitës bisedohet edhe për Ligjin për përdorimin e gjuhëve si dhe për Ligji e dëshmitarëve të mbrojtur.
Opozita e VMRO-DPMNE thotë se për shkak të ndjeshmërisë së bisedimeve nuk mund të japin detaje nga takimet me LSDM-në, se për cilat ligje deri më tani janë dakorduar e për cilat nuk po gjejnë gjuhë të përbashkët.
Partia më e madhe opozitare thotë se kthimi i deputetëve të saj në Parlament gjithashtu varet nga pikërisht këto bisedime pas bojkotit në shenjë revolte për burgosjen e deputetëve të akuzuar për ngjarjet e 27 prillit në Kuvend.
Edhe zyrtarët nga Lidhja Socialdemokrate e Maqedonisë që janë pjesë e grupit punues, hezitojnë të japin informacion nëse nga këto bisedime është arritur ndonjë marrëveshje me VMRO-DPMNE-në.
Në mungesë numrave, LSDM-ja kërkon ndihmën e VMRO-së që këta të fundit të sigurojnë shumicën gjatë miratimit të ligjeve që kërkojnë 2/3 e votave. LSDM gjithashtu ka shprehur gatishmëri që të zgjerojë koalicionin qeverisës me qëllim të sigurimit të një shumice të qëndrueshme.
Ndërkaq nga BDI-ja e Ali Ahmetit mohojnë të kenë zhvilluar takime me përfaqësues të VMRO-DPMNE-së. Ata thonë se përkundrazi takimet me partnerët e koalicionit janë të përditshme me qëllim të harmonizimit të qëndrimeve politike.
Burimi: Alsat
Discussion about this post