Në vijim të masave të marra për disiplinimin e tregtimit të mishit, Autoriteti Kombëtar i Ushqimit bllokoi sot në Durrës një pikë therjeje ilegale jashtë standardeve, e cila kryente procesin e therjes së kafshëve pa iu nënshtruar kontrollit veterinar si dhe tregtonte mish pa certifikatë veterinare, natyrisht e paregjistruar në QKB.
Shkelësi ishte shtetasi Pëllumb Kaziu, i cili aktivitetin e kundërligjshëm e kryente në katin e parë të banesës së tij në Spitallë, rruga “Manskuria” në qytetin e Durrësit.
Gjatë momentit të inspektimit të subjektit nga DRAKU Durrës u gjendën 5 karkasa qingji pa dokumentacion shoqërues.
Trupa inspektuese e Drejtorisë Rajonale të Autoritetit Kombëtar të Ushqimit Durrës, mori menjëherë masën urgjente për ndërprerje të menjëhershme të aktivitetit, si dhe masën administrative gjobë me vlerën 200.000 lekë.
Gjithashtu u sekuestruan 42 kg mish qengji, 6 kg plënc, lëkura (5 copë), thika, çengel dhe mjetet e tjera të punës që përdoreshin për therjen e kafshëve.
Subjekti ushtronte aktivitetin si njësi tregtimi mishi, por nuk rezulton i regjistruar në Qendrën Kombëtare të Bizneseve (QKB) dhe siç duket edhe në foto e video, ambienti në të cilin tregtohej produkti mish, ishte jashtë çdo stadardi edhe minimal të Sigurisë Ushqimore – duke përbërë kështu rrezik real e të vazhdueshëm për konsumatorin.
Në këtë aksion Autoriteti Kombëtar i Ushqimit ka bashkëpunuar ngushtësisht edhe me Drejtorinë e Hetimit Tatimor.
Autoriteti Kombëtar i Ushqimit iu bën thirrje të gjithë konsumatorëve që të denoncojmë pranë AKU-së raste të shkeljeve të Sigurisë ushqimore që dinë apo dyshojnë, si dhe të refuzojnë të blejnë në këto pika therje e njësi shitje të cilat tregtojnë mish të pasigurt, pa vulë veterinare, të pa licencuara, pa NIPT dhe pa kupton tatimor (kuponi tatimor është element shumë i rëndësishëm për gjurmueshmërinë e produktit nga pikpamja e sigurisë së tij).
Discussion about this post