Lihet i lirë Lutfi Kastrati, banori i Astirit i cili gjatë protestës ka bërë thirrje që të goditet me armë policia.
Në një intervistë për Televizionin Fax News, Kastrati tha se ndalimi ishte i padrejtë dhe tregoi se qeveria nuk do t’ia dijë për dhjetëra familje që po tentohet të nxirren në mes të rrugës.
Ai tha se pa mbështetjen e opozitës ajo protestë nuk do të mbërrinte deri në ditën e sotme ku falë saj shtëpitë e tyre ende nuk janë shembur.
“Ne jemi bërë pjesë e protestës së opozitës dhe kemi pranuar opozitën në protestën tonë sepse ne kemi nevojë për përkrahje politike. Pop të mos ishin disa deputetë ne nuk do mund ta vijonim gjatë protestën. Por ka qenë vendomëria e banorëve dhe mbështetja e opozitës që na ka sjellë deri këtu”.
Sipas tij me këto ndalime, po ju bëhet presion banorëve, por kjo tha ai nuk do t’i pengojë që të rezistojnë deri në fund për të drejtën e tyre.
Ndërkohë Kastrati ka ironizuar edhe kryebashkiakun Veliaj duke thënë se e falenderonte atë për stimulin që iu ka dhënë banorëve të Astirit.
“Ne falenderojmë edhe kryetarin e bashkisë, Erion Veliajn i cili na ka stimuluar aq shumë kur na quajti shpellarë. Ajo deklaratë na ka dhëna stimul për të mos e ndaluar protestën tonë deri në anullimin e projektit”.
Ai u shpreh i vendosur për të mbrojtur banesat duke kërkuar shpërblim në masë të plotë dhe sipas vlerës reale të saj.
Kujtojmë se banorët e Astirit kanë më shumë se 3 muaj që po kundërshtojnë prishjen e e shtëpive të tyre nga projekti i Unazës së madhe.
Ndërkohë punimet janë pezulluar në lotin e parë për shkak të megaskandalit të dalë, ku kompania fituese kishte falsifikuar dokumentet për të përfituar tenderin e ndërtimit.
