Ministri i Drejtësisë dhe Sigurisë në Holandë Ferdinand Grapperhaus pas vizitës që ka pasur pak ditë më parë në vendin tonë, në një prononcim për mediat në vendin e tij, është treguar mjaft kritikë me Shqipërinë, duke thënë se duhet të bëjë më shumë punë për frenimin e kriminelëve.
Grapperhaus është shprehur se bandat shqiptare janë kthyer në një rrezik mjaft të madh për Hollandën, dhe janë ndër furnizueset kryesore të kokainës.
“Bandat shqiptare po fitojnë gjithnjë e më shumë pushtet. Kriminelët shqiptarë punojnë në mënyrë të organizuar, janë kthyer në partner të besueshëm dhe për kriminelë të vendeve të tjera.
Bandat shqiptare të kokainës aktive nga Amerika e Jugut deri në Limburg. Kokaina hyn nga shqiptarët përmes portit të Roteradmit. Shqipëria duhet të mendojë seriozisht për zgjidhjen e problemit”, është shprehur Grapperhaus.
Pak ditë më parë në Tiranë, ministri holandez pati një takim me Etilda Gjonajn ku u shpreh: “Hapa shumë të rëndësishëm janë ndërmarrë gjatë viteve të fundit, ne e ndjekim këtë ecuri gjatë gjithë kohës, ku institucionet e reja të drejtësisë po formohen. Holanda mbështet perspektivën evropiane të Shqipërisë dhe unë do ta inkurajoj Shqipërinë që të vazhdojë të tregojë rezultate të prekshme dhe të vazhdueshme”.
Ndërkohë qe mediat në Holandë raportojnë se shqiptarët janë të vështirë që të identifikohen, pasi ata nuk lëvizin me makina të shtrenjta dhe nuk e reklamojnë jetën e luksit.
(E.K/FAXWEB.AL)
