Prej orëve të para të mëngjesit të sotëm policia e Kosovës është duke kryer një megaoperacion në veri të vendit, që ka si qëllim të vërë në pranga zyrtarë të korruptuar.
Në veri nuk kanë munguar as përplasjet, ku 4 policë kanë mbetur të lënduar pas rezistencës që kanë bërë personat e dyshuar.
Zëdhënësi i KFOR-it, Vincenzo Graso ka thënë se Policia e Kosovës ka ndërmarrë një operacion në gjithë Kosovën dhe ai nuk është një operacion kundër serbëve.
Graso në një prononcim për Tanjugun e Serbisë, ka thënë se ‘KFOR-i vetëm do ta vëzhgojë situatën”.
“Operacioni i Policisë së Kosovës po ndodh me urdhër të Prokurorit të Kosovës dhe nuk po ndodh vetëm në veri si dhe nuk është i drejtuar vetëm kundër serbëve, por ndaj të gjithë atyre që janë të përfshirë në krim dhe korrupsion”, ka thënë ai.
“Ne jemi duke e përcjellë situatën tani për tani dhe jemi në kontakt me autoritetet e Prishtinës”, ka thënë ai.
Sipas tij, ‘ky është një aksion normal i Policisë së Kosovës dhe KFOR vetëm do ta monitorojë situatën”.
Kujtojmë se nga aksioni i policisë në veri të Kosovës janë plagosur katër punonjës policie, ndërsa situata është tejet e tensionuar. Nuk ka munguar as retorika e ashpër nga ana e Serbisë ndërsa Vuçiç ka mobilizuar ushtrinë. (Lexo edhe ketu)
Për shkak të situatës së tensionuar është nisur sot drejt Zubin Potokut dhe ministri i jashtëm serb Ivica Daçiç. (Lexo edhe ketu)
Discussion about this post