Presidenti Meta është paraqitur sot në Komisionin Hetimor në parlament, ku po jep argumentet e tij se pse vendosi për shtyrjen e zgjedhjeve lokale të 30 Qershorit.
Meta u shpreh se përmes vendimit të tij kërkohej që të shmangej mbajtja e zgjedhjeve me një kandidat të vetëm, një e drejtë kjo që është shprehur në raste të mëparshme dhe nga Gjykata e të drejtave të njeriut në Strasburg.
Meta ka sjellë në vëmendje rastin bullgar, ku për shkak se në zgjedhje kishte vetëm një kandidat, ky shtet ishte dënuar me gjobë.
“Gjykova tepër të arsyeshme dhe të domosdoshme që të jem këtu, sepse kam bindje të plotë që cdo politikan, aq më tepër kryetari i shtetit duhet të tregojë respekt ndaj institucioneve dhe të japë shembullin e bashkëpunimit por së dyti e jam i bindur që pavarësisht se Kuvendi e ka bërë gjykimin para e të nisë hetimin, përmes rezolutës, në interes edhe të transparencës edhe të ndriçimit të cështjeve që kanë të bëjnë me vendimmarrjen për të dhënë të dhëna të tjera që mendoj se u shërbejnë të gjithëve për tu qartësuar më shumë”, tha Meta.
Presidenti ka theksuar gjate fjales se tij, se “Duke nxjerrë dekret ka mbrojtur të drejtën e zgjedhjes së qytetarëve shqiptarë dhe ka shmangur një proces jo demokratik të votimit me një kandidat. Kjo ishte sa i takon të drejtës së zgjedhjes, nëse e ka respektuar, mbrojtur, apo e ka cenuar apo dëmtuar të drejtën e zgjedhjes së shqiptarëve”.
Presidenti Meta tha më tej se ai kishte informacione se në protestën e opozitës, kishte indicie se do të digjej godina e Kuvendit, dhe për këtë shkak atij I duhej që të ndërhynte për të shmangur tragjedinë në radhët e qytetarëve apo forcave të rendit.
“Kam informacion të servirur nga ana e institucioneve të shtetit, por që janë secrete. Duhet që të marrim leje nga institucioni për të informuar Kuvendin në lidhje me këtë, por më parë duhet verifikuar certifikata e sigurisë e të gjithë anëtarëve të këtij komisioni”, u shpreh Meta.
(E.K/Faxweb.al)
Discussion about this post